يسرا: «القدر يغير مسار حياة الإنسان والسوشيال ميديا صعبت الدنيا علينا»

قالت الفنانة "يسرا": إن "القدر أحيانا هو من يغير مسار حياة الإنسان وأحيانا بنمشي في طريق تالت وبيكون القدر هو السبب، وده نعمة من ربنا انك تمشي بطريق احسن من الطريق اللي كنتي عايزاه".

وبحسب "يسرا"، في تصريحات إذاعية : "والدتي أثرت فيا بشكل كبير جداً و تعلمت الكثير من أساتذة اشتغلت معاهم على مدار السنوات الماضية فالشغلانة دي غنية جداً و صعبة تخليك تتعلم الكتير".

وعن الأشخاص السلبية التي صادفتهم في حياتها، قالت: "ممكن تتصدمي خلال رحلتك في ناس وإنهم يكونوا بالشر ده بس للأسف موجودين في حياتك، وهنا لازم توقفي وقفة مع نفسك علشان تحصني نفسك إنك تتوجعي".

أما عن الشخصيات التي أثرت في حياتها، قالت: "والدتي أثرت فيا وفي تعليمي كان ليها الفضل الأول والأخير في حياتي، وفي المدرسة كنت أحترم جميع المدرسين ولكن كنت أخاف من مديرة المدرسة و في النفس الوقت علمتني أشياء كثيرة".

وإختتمت "يسرا "، قائلة: "أنا محددة استخدامات السوشيال ميديا مش بالمشاهدات ولا بالشير ، وكمان السوشيال ميديا لا تستخدم في السبب الرئيسي لوجودها و هي الحصول على المعلومة الحقيقة، السوشيال ميديا كانت موجودة علشان تسهل الدنيا ولكنها صعبتها".