أحمد الطيب لـ«شوبير»: أنا «زملكاوي».. وملعون أبو الفلوس اللي تخليك كدة

شن المعلق الرياضي أحمد الطيب، هجومًا حادًا على محمد عبد الوهاب عضو مجلس إدارة النادي الأهلي، قائلًا: «لما يقول مايعرفش أحمد الطيب يبقى هو عضو مجلس إدارة ليس له علاقة بكرة القدم، وهو كدة مش بتاع كورة».

ووجه الطيب، رسالة، خلال مداخلة هاتفية لبرنامج «الكرة في دريم»، والذي يقدمه الإعلامي «خالد الغندور»، أمس الجمعة، إلى إلإعلامي أحمد شوبير، قائلًا: «أنت اتوقفت عن العمل في النيل للرياضة، وماينفعش واحد يقول أنا أو فلان في القناة، إحنا مش في عزبة ولا نادي فيديو، أنت في قناة تتبع دولة، وماتسوقش الدولة زي ما أنت عايز، ومفيش مسئول كبير بيطلع ينتقد قناته وبيقول ده تعصب، أنت اللي بتعمل التعصب أنت ماكنتش كدة، إيه اللي خلاك كدة، ملعون أبو الفلوس والمناصب اللي تخليك تبقى كدة معايا».

وأكمل: «أيوة أنا زملكاوي، هما هايدخلوني النار مثلا، اتكلمت عن شعبان عبد الرحيم وعبد الباسط حمودة وإيهاب توفيق، بعدين ماله شعبان هو كخة مش ده راجل شعبي والنادي الأهلي بينتمي للشعب».