المحامي مينا ناجي يكشف فى حوار لـ ”النهار” سر دفاعه عن فتيات ”تيك توك”.. ويفجر مفاجأة بخصوص ”سما المصري”

عرف إنه محامي القضايا الساخنة ومدافع عن فتيات ال"تيك توك"، يرى أنه يجب تقويمهم وتوجيههم، قبل الحديث عن معاقبتهم.

التقي موقع "النهار" مع المحامي مينا ناجي وتحدثنا معه عن العديد من الملفات المهمة، والتى تشابك معاها، فى حوار يأتي ضمن سلسلة حوارات قانونية يقدمها الموقع لقرائه أسبوعيًا.. وإلى نص الحوار:

قضايا تيك توك تمثل صداع مؤخرًا بسبب انتشارها بشكل كبير.. وحضرتك توليت الدفاع عن عدد من هؤلاء الفتيات.. إذًا

بدايةً.. كيف كانت بدايتك والتحاقك بكلية الحقوق؟ وهل ممكن تترك المحاماة؟

بدأت علاقتي بالمحاماة بعد ما تخرجت، ومكنتش حابب الحقوق إلا لما أشتغلت فيها، فالدراسة مختلفة تماما عن الشغل العملي، واتعلمت مشتغلش بإستهتار فممكن ورقة تضيع موكل، ومش ممكن أسيب المهنة أبدًا أنا لو معايا 100 مليون جنيه، هكمل في المحاماة، أنا لو كل يوم مترافعتش بأخد صفحة وبعمل منها مرافعة، زي ما بيقول الكتاب.

حدثنا عن أبرز قضية عملت بها بعد التخرج؟

أبرز القضايا اللي خلتني أحب الشغل الجنائي كانت قضية إتجار بالبشر، قبل الأختصاص الرقمي لدوائر الإتجار بالبشر، كانت مع أستاذي وكنت حاضر عن المتهم الأول، وأستاذي كان حاضر عن المتهم الثاني، وفاكرها زي الشمس وأتحجزت وقتها للحكم شهر وأخدنا فيها براءة، ودي اللي بعدها ربنا كرمني، وبدأت مسيرتي في مجال المحاماة بعد التخرج.

حدثنا عن القضايا التي كانت نقطة تحول فى مشوارك المهنى؟

كل القضايا من أول السلاح الأبيض حتي الجنايات كلهم أبرز القضايا، وكنت بشتغل كلهم بنفس المجهود، القضايا الكبيرة زي الصغيرة، لكن القضايا الصعبة بالنسبالي هي اللي بيكون الإعلام فيها حاضر وبتأخد اتجاه مختلف تماما، لكن قضايا المخدرات والسلاح والقتل اللي بعيدة عن الإعلام بالنسبالي لو طبقت القانون صح ربنا بيكرمني فيها.

ما الذي يدفعك لرفض قضية معروضة عليك؟

اللي يدفعي لرفض قضية معروضة عليا هي لما أحسن أن المتهم مش بريء، في قضايا كتير برفضها وبكون صريح وببلغ أن فيها حكم، مش بكذب علي حد إلا لو الورق خاني لان أكيد مش كل التوقعات بتخدمنا، في قضية حصل فيها كده وخاني التوقع فيها وهي قضية من 8 سنين لإتجار بالبشر وكنت متوقع فيها براءة، وربنا مكرمنيش، تم الحكم فيها بـ 15 سنة، القضية كانت عنيفة شوية وجديدة قدام الدوائر.

أذكر لينا نماذج من أسماء الأستاذة الذين وقفت أمامهم في محاكمات أو تحب تسمع مرافعاتهم؟

أستاذ منصور رياض أستاذي وأتعلمت منه كتير، الدكتور محمد حمودة بالرغم من أنه لم يشتغل بقضايا الإتجار بالبشر وبحب أسمع له مرافعات كتير، والدكتور محمد بهاء أبو شقة بفتح كل مرافعاته، وأسمعها وبتعلم منه، كان نفسي في يوم من الأيام أشتغل مع أستاذي بهاء الدين أبو شقة، وإن شاء الله ربنا يكرمني وأقف جنبه عشان أتعلم من مرافعته.

كيف تنظر لأزمة فتيات "التيك توك"؟

ربنا يهديهم، واللي بتعرض محتوي كويس بتبقي عارفة إنها بتعرض محتوي كويس والعكس صحيح، ففي لجنة "النهي عن المنكر"، بيرأسها أستاذي أشرف فرحات وهو الذي يتولى تقديم البلاغات ضد الفتيات، وأنا بدعي لهم أن ربنا يهديهم.

لية بتدافع عن فتيات التيك توك وهل حضرتك شايفهم مظلومين ولا لا ؟

أنا مباخدش قضية إلا لو عارف إنها مظلومة، ففي نماذج بتكون طائشة ونماذج إجرامية، ففي البداية بنعتبرها حالة طيش فمش من أول غلطة بنعاقب دا ربنا بيسامح، وأنا دوري بينتهي في القضية لما أقولها مبروك أو أنا أسف القضية خذلتني.

ما تعقيبك على أزمة فتيات التيك توك وكمية البلاغات المقدمة ضددهم؟

لو كل واحدة اختارت المحتوي بتعها اللي هتعرضه من الألف إلي الياء واقتنعت في يوم من الأيام أنها هتكون خلف القضبان، وبتاخد عبرة من اللي قبلها اللي اتحبسوا مش هتلاقي أي محتوي خادش علي ال"تيك توك" أو "السوشال ميديا" بشكل عام.

متى تنتهى قضايا فتيات "تيك توك"؟

تنتهي قضايا ال"تيك توك" لما ربنا يهديهم، عايزين نسأل نفسنا ليه بيعرضوا علي ال"تيك توك"، أي واحدة في بداية عمرها تسعي للشهرة، وبتحب وهي وماشية يتقال فلانة أهي، وفى البداية بتيجي الشهرة ثم الربح، ثم بعرض مشاهد مخلة لزيادة المشاهدات، وتنتهي خلف القضبان.

هل أحنا محتاجين تشريع يضبط عملية النشر على المنصة وغيرها من منصات التواصل؟

للأسف هناك الكثير من المنصات لا تبث داخل مصر، هناك العديد من المنصات إدارتها تبدأ من الصين وغيرها مثل تطبيق ال"تيك توك"، لكن نستطيع المراقبة والمتابعة من خلال الإدارة العامة المختصة بجرائم تقنية المعلومات وهي من تقوم بتحريك الدعوة الجنائية.

سما المصرى أسم لمع وأختفى فجاءة كلمنا عن قضاياها وموقفها القانوني الحالى؟

ربنا يفك ضيقتها، أحنا دلوقتي في قضية ليها وبنفذ فيها وبإذن الله خلاص النص الأخير من السنة دي نسمع خبر خير عليها.

دعنا نسأل عن إسلام جابر لاعب الزمالك.. إيه قصة قضية النسب وإيه أخر ما وصلت إيه القضية؟

أنا أخدت رفض الدعوة المحركة من المدعية، وعندي قضية محركاها بناء علي عقد الزواج العرفي، وأنا ما أعرفش هي جابت من فين أن في عقد زواج عرفي.