منة فضالي: في فرحي هلبس بدلة سموكين والعريس فستان

كشفت الفنانة منة فضالي، سبب انفصالها عن زوجها الأول، والتي تزوجته رغمَا عن رفض والدتها، بسبب أنه كان يكبرها بـ20 عامًا.

وقالت منة فضالي خلال لقاءها فى احدى البرامج التلفيزيونية: ماما تعبت وضغطها علي وأغمى عليها وكانت هتتشل.

وتابعت: فكرت في فترة ما انى اجمد بويضات ولكن اتقالي بيأثر على الست، وأنا لسه مش عارفة هتجوز ولا لأ، وأنا صعب جدًا حد يتعامل معايا ومحدش عارفني كويس عشان يتعامل معايا، فبالتالي مبيستمروش، ولازم يعرفوا ايه اللي أنا بحبه قبل اللي بكرهه وهكذا.

واستكملت منة فضالي حديثها: طبعا اتعرضت للخيانة ودي قصة معروفة قفشته وحسيت أن في حاجة مش تمام ولقيت فضائح، أنا بحترم الراجل جدًا ومش ضده بل بالعكس، ودايمًا بشوف الراجل لما بيشوف واحدة على مراته يبقى العيب من الست أو هي اللي بتضطره أنه يبص برا أو عينه فارغة .

وصرحت منه: إنها لم تقيم حفل زفاف في زيجتها الوحيدة، مشيرة إلى أنها ارتدت فستان الزفاف كثيرًا خلال أعمالها الفنية، إذ ارتدته لأكثر من 30 مرة.

وأضافت فضالي : أنها لا تريد ارتداء أي فستاين للزفاف بسبب كثرة ارتدائها خلال أعمالها الفنية.

وأوضحت: "لبست حوالي 30 فستان فرح، مش عايزة ألبس فستان فرح، زهقت"، متابعة في سخرية: “بفكر لما آجي أتجوز ألبس بدلة سموكين، وألبس العريس هو الفستان”.

وأضافت : أنا مصرفة جدًا ولازم اللي يجيلي يبقى جيبه مليان، وأنا ارتبطت بواحد مكنش معاه 3 الاف جنيه في جيبه، وصرفت عليه فلوس كتير، ومكنتش ناصحة وكنت صغيرة، نبقى خارجين مثلا ويحصل موقف ويخلع بطريقة ما.

وقالت الفنانة منة فضالي إنها ممتنة لوالدتها، بسبب وقوفها بجانبها طوال حياتها، خاصة بعدما تركها والدها، وعملت والدتها حتى تستطيع أن تؤسس لها حياة جيدة

وتابعت منة فضالي : أمي فقدت بصرها من كام سنة، جالها جلطة في عنيها وعملت كذا عملية، وهي كبرت دلوقت وأنا حاسة إن هي اللي بنتي، وأنا بخاف عليها ونفسي تكون مبسوطة وسعيدة لأنها ضحت بشبابها عشاني.

واستكملت منة : لما ماما تعبت بابا اتصل وسأل عليها لأنه كان عنده مشكلة برضو من سنين في عنيه ولكن مش زي والدتي، وماما دلوقت بتشوف بعين وعين لأ.

وأضافت منه، إنها اضطرت للارتباط من رجال أكبر منها سنًا بسبب ترك والدها لها، وهي في مرحلة الطفولة.

وتابعت : بابا موجود ومش موجود، وكنت شايفة طول الوقت أنه مش موجود بارادته، بزعل، اتعودت أبقى قوية وأني معتمدتش على حد، وكنت بدور على الارتباط أني ارتبط بناس أكبر مني سنًا، وكنت بدور على الأب في علاقاتي، وكنت مرتبطة بناس أكبر مني بـ 30 سنة، وبطلت دلوقت أدور عليه، عندي عماتي بيسألوا عليا وأعمامي بيكلموني طول الوقت ولكن مبنتقابلش باستمرار، وعندي عمة مفضلة بحبها، وعندي أخوات مسافرين برا مصر، وأخوات معرفش عنهم حاجة.

واستكملت فضالي : أنا كبرت وأتعودت أكون لوحدي، بعد ما كبرت حسيت أني مش خسرانة، أمي تعبت وشقيت عشان تكبرني، وكنت بشوف ده، عندي صحابي بيتطلقوا قريب وقولتلهم متطلقوش عشان الأطفال هتدفع تمن ده محدش هيدفع التمن غيرهم، وهو مش حاسس أنه بيخسر ولاده وهيفتقد يشوفهم وهما بيكبروا، أي حد بيخسر ولاده في الوقت ده عمره ما هيرفع يرجعهم تاني.

وأضافت : شفت والدي لأول مرة وأنا عندي 21، وجالي عريس وقعد معاه وكان العريس عايش في أوروبا، وقالهم خدوها ومش عايز منكم أي حاجة واحنا بنشتري راجل، وقال لأمي هما بيحبوا بعض وخلينا نخلص، ولما العريس حكالي قولتله مستحيل بابا يعمل كدا، قالي لأ قالي كدا، مستحيل أب يعمل كدا

واختتمت منة فضالي: لما بتفرج على فيلم أو مسلسل وبشوف مشاهد عن الأب بعيط، وأنا شخصية حساسة وكل حاجة بتأثر فيا، ومبحسش أني عايزة أكلمه، هو ميعرفش عني حاجة دا بابا ناسي عيد ميلادي، عمري ما حسيت أنه عنده مشاعر تجاهي.