نوارة نجم: أماني الخياط دعت على باسم يوسف
علقت الناشطة السياسية نوارة نجم، على اعتذار الإعلامي باسم يوسف عن مقاله المقتبس من كاتب إسرائيلي، فقالت: "خلاص بقى قال لكوا أنا غلطان ومتخلف وغبي واستهبلت.. ما تبالغوش عشان تدوا فرصة لغيره لما يغلط يعتذر وإلا حتساعدوا في تنمية ثقافة المكابرة على حساب الاعتذار، خاصة أنه غالبا الجيش حيعتذر عن اختراع الكفتة وحتلاقوا ناس بتبرر، فادوهم فرصة يعتذروا بدل ما يكابروا ويقولوا لا حنحول الإيدز لكفتة".
وأضافت نوارة في تغريدة لها عبر "تويتر"، اليوم الأحد: "هي غلطة كبيرة وهو قال إنها غلطة كبيرة، التنكيل بالمعتذر حيخلي أي حد تاني يقول دي عالم واطية لما بنعتذر لهم بيركبونا.. إحنا في مصر ما نعرفش ثقافة اعتذار وفعلا سلوكنا ناحية المعتذر واطي، عايزين ننمي الثقافة دي عشان نفلح في أي حاجة في سنينا السودا".
وتابعت: "وعموما خلاص حطوا عليه، هو كان جوز خالتي، بس أشوف واحد بقى بيبرر لما اختراع الكفتة يطلع ما بيطلعش كفتة، ومش فاهمة اللي بيقولوا طب ما نقبل اعتذار مبارك ومرسي.. لما باسم يقتل حد أكيد مش حاقبل اعتذاره".
واستطردت نوارة: "وأكيد أفضل لنا أن الجيش يتراجع عن اختراع الكفتة ونقبل الاعتذار بدل ما نتفضح في العالم ويصمم أنه بيحول الإيدز لكفتة والناس تشاور علينا وتضحك.. وعموما أنا قلت أقول البقين دول وارجع اختفي تاني... سلام".
وواصلت نوارة: "بس ياريت ماحدش يزعل أماني الخياط تاني عشان واضح انها دعت عليه".