عصام السقا: أحب تقديم الشخصيات الطيبة لأنها تجذب الجمهور؛ والسقا سبب حبي للتمثيل

نجح في أن يحفر لنفسه اسما وسط عالم النجوم، لديه مثابرة وقوة جعلته يترك بصمته الخاصة في كل عمل يشارك به، ولفت إليه أنظار الجمهور بشخصية نعيم في جعفر العمدة، التي تألق بها ووضعته جنب إلي جنب مع كبار النجوم، لتبدأ بعدها المنافسة في الأعمال الدرامية والسينمائية،إنه الفنان الشاب عصام السقا، والذي كان للنهار هذا اللقاء معه.

*هل توقعت ردود الأفعال عن دورك في فيلم الإسكندراني؟*

_ بصراحة مكنتش متوقع رد الفعل الجامد دا من الناس وانه الفيلم يكتسح شباك التذاكر كنت عارف إننا هننجح لكن حجم النجاح الي شوفته صدمني ودخلني في حالة فرحة جامدة أوي الحمدلله والشكر لربنا طبعا.

*حدثنا عن استعدادك للدور وهل كان هناك صعوبات أثناء التصوير ؟*

_دور ذكي أخذ مني مذاكرة كتير ،، وأي دور عموما بياخد مني مذاكرة وتحضيرات للشخصية بداية من اللكنة إلي السيناريو والأداء ..إلى آخره، لكن الصعوبات الي واجهتنا مكانتش في التصوير أنما كانت في تسلسل الأحداث لأن ذكي بيتعرض لنقلات كبيرة أثناء الفيلم من شاب فقير وبيغترب وبيكح تراب لغني وبيلعب بالفلوس هو وصاحبه فكان لازم الواحد يتعب عشان يوصل للمشاهد النقلات دي، كمان السفر والتنقل ومشاهد الأكشن كانت صعبة لكن الحمدلله الواحد قدر يطلعها بالشكل الي يرضي المشاهد.

*كيف كانت كواليس العمل مع أحمد العوضي وخالد يوسف؟*

_كانت كواليس جميلة الصراحه العوضي صاحبي جدا عالصعيد الشخصي ودا انعكس بشكل واضح في الفيلم الحمدلله والشغل معاه ممتع وجميل لأنه صاحبي وكنا عاملين حاله شقاوة في البلاتوه والأستاذ خالد من أحسن وامتع المخرجين الي اشتغلت معاهم ،لأنه إنسان ذو خبرة فنية لايستهان بها وسلس في التعامل وبياخد الشغل بمحمل الجد نتيجه حبه لشغله وكمان كان بيطلع أحسن وأجمل ما في الفنان الي معاه ودا اللي بيخلي أفلامه وأعماله جميلة وناجحة.

*زكي في فيلم الإسكندراني الصديق الوفي للعوضي، مخفتش من تكرار الدور أو النمطية بعد جعفر العمدة خاصة أن الدور مشابه لشخصية نعيم ،و الناس ممكن تشوفه امتداد لشخصية نعيم؟*

نعيم كان حالة فردية لوحده وذكي حاله فردية والاثنين بيمثلو الشاب المصري الأصيل الجدع الي يفدي صاحبه بروحه، مخفتش أبدا من تكرار أي حاجة بخصوص التشابه بين الشخصيتين لأن كل واحد فيهم له سمات وصفات وبيئة غير التاني تماما عشان كدا مكنتش قلقان أن الناس تشوفه امتداد ،،ذكي من بيئة ونشأة غير نعيم تماما وحتى لو حصلت ف الجمهور وأنا بصفة شخصية بحب الشخصيات الطيبة وكلنا بننجذب لها جدا في حياتنا والإنسان المخلص الوفي بيتحب جدا وأحب دايما الناس تفتكرني بصورة كويسة وطيبة.

*النجاح الكبير الذي حققه نعيم في جعفر العمدة..هل جعل لديك حرص في إختيار الأعمال التالية لتكون بنفس الجودة؟*

_طبعا .. بتكون حاجة صعبة لأن الفنان لازم يحافظ على ما وصل له من مكانة ونجاح ولازم تكون كل أركان العمل الناجح موجودة ولابد أن الفنان يختار بحرص شديد لانه مينفعش بعد ما يتقدم الفنان خطوات لقدام في شغله يرجع خطوات تانية لأي سبب.

*حدثنا عن تجربة مسلسل يحي وكنوز؟*

_يحيى وكنوز من أحب وأجمل التجارب لقلبي لأن الوقفة خلف المايك لا تختلف عن التمثيل أمام الكاميرا الإثنين محتاجين مجهود جامد لكن التمثيل الصوتي أشد اجهادا لأنه بيحتاجك تبذل مجهود أكبر عشان توصل للمشاهد إحساسك بانفعالاتك الصوتية.

*ماذا عن تجربة مسلسل العودة ؟*

_مسلسل العودة بشوفه من أهم محطات شغلي وأخد مني وقت ومجهود لمذاكرة شخصية العمدة القوي الحكيم العادل وكانت تجربة جميلة جدا والناس اتفاعلت مع الدور بشكل حلو جدا وعجبتهم القصة والحبكة والألغاز الي كانت موجودة وكمان الجانب الرومانسي علق جدا مع الناس.

*ماهي المقومات التي يجب أن يتبعها الفنان ليحافظ علي مكانته في الصدارة؟*

_الصدق في أداء شغله وحبه لمهنته وتطويره من نفسه ومذاكرته وثقافته الي بتساعد في توسيع مداركه كفنان هما دول مفاتيح الحفاظ على قمة الفنان وعلى مكانته الي وصلها بتعب ومجهود ومذاكرة ليالي كتير.

*طموح عصام السقا واصل لفين في الفن؟*

واصل لبعيد أوي طول ما الإنسان مفيش سقف لطموحه طول ماهو يقدر يصنع المعجزات وأتمنى من ربنا سبحانه وتعالى أنه يرزقني التوفيق والحظ لأني أوصل لكل الأحلام والطموح الذي أتمناه.

*ما هو سر ربط أسمك بإسم الفنان أحمد السقا؟*

علاقة الصداقة والأخوة التي بيني وبين أحمد كبيرة جدا خصوصا أنه على الصعيد الشخصي عزيز جدا جدا عليا وكان أيقونة بالنسبة لجيلنا وكان له دور كبير لايمكن تجاهله في حبي للتمثيل والفن.

*أنت من عشاق الخيل. فهل الفن أخذ كل وقتك عن هواياتك المفضلة؟*

_ لا أبدا بالرغم من أن الفن بيحتاج مجهود جبار وشاق وساعات بنواصل أيام بدون نوم عشان نصور مشهد، لكن مهما كان مقدرش استغنى عن وقتي مع الخيل لانه بحس إني بشحن طاقتي وأنا جنبها وأنا باخد بالي من الخيل بتاعي وبيكون من امتع أوقات حياتي الي بقضيها مع الخيل.

*حدثنا عن أعمالك القادمة للدراما الرمضانية 2024؟*

_إن شاء الله سترونني في مسلسل صدفة للفنانة ريهام حجاج وإن شاء لله ينجح وينول إعجاب المشاهدين .

*بعد نجاح فيلم الإسكندراني. هل هناك مشاريع لأعمال سينمائية قادمة؟*

_إذا عرض علي دور جيد سأكرر التجربة إن شاء الله.

*هل أصبح عصام السقا تميمة الحظ لنجاح أي عمل؟*

_هو توفيق ربنا الي بيلازم الشخص الحمدلله عشان كدا بيحالفه الحظ ولو الناس هتعتبر عصام السقا كدا هتكون حاجه مفرحة وجميلة جدا بالنسبالي والله الحمدلله على توفيقه ونجاحه وإن شاء الله الأدوار القادمة تكون بنفس قدر نجاح دور ذكي الإسكندراني ونعيم العمدة بأمر الله.