مجدي عبد الحليم: ولادي قالولي شوف شغلانه تانية

أعرب الفنان مجدي عبد الحليم، عن قلقه من نسيان الجمهور له بسبب قلة أعماله خلال الفترة الماضية، مؤكدًا أنه أصبح في سن المعاش وتواصل مع عدد من النجوم ليشارك في أعمال فنية.

وقال مجدي عبد الحليم، في لقائه مع الإعلامية إنجي هشام، في برنامج المنسي، المذاع عبر شاشة قناة هي: المسرح هو البيت الأول، والتلفزيون الشغل فيه صعب، والمسرح هو مصدر رزق ثابت وأنا طلعت معاش دلوقتي الحمد لله، والمسرح زي ما هو له جمهور، ولكن الكتابة اتغيرت ومبقاش في مسرحية 3 فصول، بقى في الاستكتشات والضحك السريع، والجمهور ميقدرش يقعد لـ مسرحية 3 فصول، وعلشان كده إحنا في مسرحية طيب وأمير فاصلين.

وتابع: أنا عندي رضا وقناعة بأن الإنسان هياخد رزقه، إحنا أُمرنا أن نسعى والنجاح من عند ربنا، واتخضيت إني عملت 350 عمل، مش هنشتغل قد ما اشتغلنا، أنا اشتغلت مع كل نجوم مصر، وبداية نجوم كبيرة زي محمد رمضان كانت قدام عيني، واللي يقدر يقف على المسرح ويطلع الضحكة هو اللي هيقدر في السينما والتليفزيون، والمسرح هو عمود الفن.

وأضاف: الأولاد قالولي شوف شغلانة تانية يا بابا علشان الدنيا والظروف، قولتلهم مش هينفع والزرق من عند ربنا، بس أنا قدرت في الفترات اللي ميكونش فيها شغل أجيب شباب وأدربهم وأعمل زي ورش تمثيل، عمل مسلسلات وفوازير وكل اللي نفسي فيه، ورش التمثيل مش مربحة ولكني كنت دايمًا بكتفي إني أجيب حق المصور، هي فترة لغاية ما أشارك في موضوع كويس، وأنا كنت بكلم أستاذ محمد صبحي على الشغل، وأكتر حد كان بيقف معايا في الفترات العصيبة دي الدكتور أشرف زكي.

واستكمل: كلمت السنة دي مدام وفاء عامر لأننا بدأنا مع بعض ذئاب الجبل، وكان عندي حياء زمان إني أطلب من حد شغل، ولكن خوفي طول الوقت إني اتنسي لأن الناس بتشوفني في الشارع تقولي أنت فين مش ظاهر ليه؟ والمسألة كانت محرجة، وهي خدتني من إيدي دخلتني للمخرج والرزق بتاع ربنا، وكل حاجة ليها سعي وأنا بسعى على قد ما أقدر.

أما عن حقيقة وجود شللية داخل الوسط الفني، فعلق مجدي عبد الحليم: هي بتتاخد على أساس أن لما عملنا عمل ونجحنا هنفضل مستمرين، زي المخرج محمد سامي والنجم محمد رمضان نجحوا مع بعض هيسيبوا بعض ليه؟ وهما بيكملوا نجاحهم وأستاذ محمد سامي اشتغل مع تامر حسني ونجوم مصر كلها.

وأردف: أشرف زكي هو أكتر واحد حاسس من الكل، والنقابة عليها دور إنها تفكر لكن الرزق على ربنا، والدكتور أشرف مش هيقدر يعمل كل حاجة، ولكن هو طول عمره صاحي وعارف وفاهم كل حاجة وبيقدم حلول، والنقابة مش هتقدر تقول للناس شغلوهم، الشغل رزق وسعي.